خلال الفترة الأخيرة ظهر بعض الجدل عن تعويم جديد للجنيه، لكن بعدها ظهر الرئيس السيسي وحسم كل الكلام ال1ي انتشر وقتها وقال إننا لن نعوم الجنيه لو هذا سيؤثر على المصريين.
الكلام ده فسره كتير من الناس إن الحكومة مش هتعوم الجنيه، بس ده هيكون مخالف لشروط صندوق النقد الدولي في برنامج الاصلاح الاقتصادي
بس يا ترا هل قرار الرئيس السيسي هيأثر على اتفاقنا مع صندوق النقد؟ وهل ممكن ده يلغي أو يأجل برنامج الإصلاح الاقتصادي؟
كل ده وأكتر هتعرفه بس تابعنا في الفيديو ده..
سكريبت..
الرئيس السيسي من فترة كان علق على موضوع تحرير سعر الصرف وقال إنه لو هيضر المصريين يبقى بلاش منه، التصريح ده اعتبره البعض أن الحكومة مش هتقرر تعوم الجنيه الفترة الجاية
وده هيخالف شروط صندوق النقد بسعر صرف مرن للبلاد، بس السؤال هنا هو فعلا الحكومة ممكن تلغي برنامج الإصلاح الاقتصادي مع صندوق النقد؟
بص يا سيدي، بحسب هاني جنينة الخبير الاقتصادي، إن الحكومة المصرية ممكن تلغي برنامج الإصلاح الاقتصادي مع صندوق النقد، أو تأجل استكماله للسنة الجاية لحد ما نقدر نوفر السيولة الدولارية
وبحسب كريستالينا جورجيفا، مديرة صندوق النقد الدولي، في تصريحاتها مع اقتصاد الشرق، إن مصر خدت خطوات صحيحة في برنامج الإصلاح الاقتصادي، وده لأنها اتفقت مؤخرًا مع مؤسس التمويل الدولية التابعة للبنك الدولي عشان تستفيد من خبرتها لتسريع عملية خصخصة الشركات المملوكة للدولة
بس قالت إن الحكومة المصرية في حاجة لتقييم البيئة العالمية المتغيرة، وتحدد الطريقة اللي من خلالها تقدر تعزز تنافسية اقتصادها، وده من خلال 3 محاور
المحور الأول، إن الدولة لازم تنسحب من الأنشطة اللي القطاع العام مش مؤثر فيها، عشان يعزز دور القطاع الخاص ويوفر فرص عمل بشكل أكبر
أما المحور تاني، فقالت لازم الحكومة تبذل جهد عشان تدعم الفئات الضعيفة من الفقراء، من خلال تقليل الدعم اللي بيستفيد منه الأغنيا، وده اللي مصر بتسعى أنها تنفذه دايما
والمحور التالت بقى، فهو بيتمثل في تعزيز احتياطات البلد من العملات الأجنبية، وعلى فكرة دي قالت أنه هيكون في تقدم كبير لحل الأزمة دي خلال الفترة الجاية ولما إتسالت عن رأيها في تصريح الرئيس السيسي عن تعويم الجنيه؟
ردت وقالت إن لما يكون في أسعار صرف كتيرة ده بيخلي بعض الناس تاخد إمتيازات مقابل إن في ناس تانية بتتحرم منها، كمان دعم العملة مع عدم وجود احتياطات كافية من العملات الأجنبية ده هيترتب عليه استنزاف الاحتياطيات وزيادة صعوبة الوضع
وقالت كمان إن الوضع في مصر مش اقتصادي بس ده كمان ليه علاقة بالاقتصاد السياسي، لكن على أي حال لازم يتم إتخاذ كل الإجراءات الضرورية لحماية الاحتياطات الأجنبية من العملات وقالت إن الصندوق مستمر في المناقشات مع القاهرة للوصول لحل
بس ياترا الرئيس قال إيه عن تعويم الجنيه؟
الرئيس السيسي قال في مؤتمر صحفي، إن الحكومة إتدخلت في سعر الصرف لتثبيت سعر الدولار، وقال كمان إن لو تعويم الجنيه هيأثر على المصريين يبقى بلاش منه حتى لو هيتعارض مع صندوق النقد
وقال إن مصر ثبتت سعر الدولار مقابل الجنيه من خلال إيداع الدولار في السوق والتدخل في سعر الصرف، وبالتالي الحفاظ على قيمة الجنيه لأنها بتتعلق بحياة المواطنين والأمن القومي
ودلوقتي قولنا شايف إننا هنكمل برنامح الإصلاح الاقتصادي مع صندوق النقد ولا لأ؟
